სიახლეების გამოწერა

ქალაქ თეთრიწყაროში მხარეთმცოდნეობის მუზეუმის შენობის რეკონსტრუქციის სამუშაოები მიმდინარეობს. პროექტის მიხედვით გათვალისწინებულია, შენობის ინტერიერის რეაბილიტაცია-რეკონსტრუქცია. შენობაში უკვე შეიცვალა ამორტიზებული ხის კარ-ფანჯრები, გადაიხურა სახურავი, ამ ეტაპზე მიმდინარეობს ინტერიერის რეაბილიტაცია, რომლის ფარგლებში მოეწყობა შესაბამისი სტანდარტების, თანამედროვე საგამოფენო სივრცე.

პროექტი ხორციელდება, ასოციაცია „სამხარეო განვითარება მომავალი საქართველოსთვის“ (RDFG) მიერ, სოფლისა და სოფლის მეურნეობის განვითარების ევროპის სამეზობლო პროგრამის ENPARD-ის მეორე ფაზის ფარგლებში მიმდინარე პროექტის - „სოფლის მდგრადი განვითარება თეთრიწყაროს მუნიციპალიტეტში“, საგრანტო კონკურსის შედეგად მიღებული გრანტით და თეთრიწყაროს მუნიციპალიტეტის მერიის თანადაფინანსებით.

თეთრიწყაროს მხარეთმცოდნეობის მუზეუმში დაცულია 11 ათასამდე ექსპონატი, მათ შორის, გვიანი ქვის ხანის (ძვ.წ.აღ VII-IV სს) არქეოლოგიური მასალა, ასევე, ეთნოგრაფიული, ისტორიული მასალები, ნუმიზმატიკური კოლექციები, ხელოვანთა ნამუშევრები და ა.შ.

მხარეთმცოდნეობის მუზეუმში მიმდინარე სამუშაოებს, თეთრიწყაროს მუნიციპალიტეტის მერის მოადგილე ბერდია ხვისტანი და ააიპ „კულტურისა და სპორტის ცენტრის” ხელმძღვანელი დავით ყაზახაშვილი ადგილზე გაეცნენ.

 პროექტის საერთო ბიუჯეტია 256,442 ლარი. აღსანიშნავია, რომ თეთრიწყაროს განვითარების ჯგუფის (LAG) მიერ შემუშავებული 2018-2022 წწ. ადგილობრივი განვითარების სტრატეგიის ერთ-ერთ მთავარ პრიორიტეტს წარმოადგენს ადგილობრივ დონეზე სოციალური და ტურისტული ინფრასტრუქტურის განვითარების ხელშეწყობა. სწორედ ასეთ პროექტს წარმოადგენს ქალაქ თეთრიწყაროში არსებული მხარეთმცოდნეობის მუზეუმის შენობის რეკონსტრუქცია.