სიახლეების გამოწერა

11 თებერვალს თეთრიწყაროს მუნიციპალიტეტის მერიაში საჯარო რეესტრის ეროვნული სააგენტოს მიერ, მიწის რეფორმის ფარგლებში, კანონმდებლობაში განხორციელებული ცვლილებების თაობაზე ტრენინგი გაიმართა. მიწის რეგისტრაციის სახელმწიფო რეფორმის ფარგლებში შემუშავებული გამარტივებული წესის დანერგვა მიწის ნაკვეთებზე უფლებათა რეგისტრაციის პროცესის დასრულებას შეუწყობს ხელს. ეს ერთი მხრივ, დაიცავს მესაკუთრეთა უფლებებს, მეორე მხრივ კი, დაეხმარება მთავრობას, შეიმუშაოს სოციალური პროექტები, წარმართოს მიწის ადმინისტრირებისა და მიწათსარგებლობის ეფექტიანი პოლიტიკა, რომელიც ხელს შეუწყობს უწყვეტ ეკონომიკურ ზრდას სოფლის მეურნეობისა და აგრობიზნესის სექტორებში.

რეგისტრაცია კვლავინდებურად იწარმოებს ორი სახით: სპორადული და სისტემური წესით. როგორც სპორადული, ისე სისტემური რეგისტრაციის ფარგლებში: ფართოვდება უფლების დამადასტურებელი დოკუმენტების ლეგალიზების საფუძვლები; კიდევ უფრო მარტივდება ფორმის დაუცველად დადებული გარიგებების საფუძველზე უფლებათა რეგისტრაციის წესი; მარტივდება საკუთრების უფლების რეგისტრაცია საკარმიდამო მიწის ნაკვეთებზე; შესაძლებელი ხდება საკუთრების უფლების რეგისტრაცია იმ კომლების (ოჯახების) მფლობელობაში არსებულ მიწის ნაკვეთებზე, რომლებიც აღრიცხულნი არიან საკომლო წიგნებში, მაგრამ საკომლო წიგნში მათი ქონებრივი მდგომარეობის შესახებ ინფორმაცია შევსებული არ არის. ტრენინგს ესწრებოდნენ: თეთრიწყაროს მუნიციპალიტეტის მერის მოადგილეები მალხაზ სამაშვილი და ბერდია ხვისტანი, მერიის სამსახურის ხელმძღვანელები, მერის წარმომადგენლები ადმინისტრაციულ ერთეულებში, წარმომადგენლების თანაშემწეები და აღიარების კომისიის წევრები.

ტრენინგს უძღვებოდნენ: საჯარო რეესტრის ეროვნული სააგენტოს გეოდეზიისა და გეოინფორმაციის დეპარტამენტის უფროსი ივანე ცარციძე, ქონების რეგისტრაციის დეპარტამენტის მენეჯერი ანა მელაშვილი, იურიდიული დეპარტამენტის სასამართლოებთან ურთიერთობის სამსახურის იურისტი ირინა კვაჭანტირაძე. დეტალური ინფორმაცია იხილეთ მითითებულ ბმულზე:https://napr.gov.ge/p/1899