სიახლეების გამოწერა

  თეთრიწყაროს მუნიციპალიტეტის მერიის დაკვეთით სოფელ ჭივჭავის, ირაგის, ალექსეევკის და სამშვილდის საჯარო სკოლებში სველი წერტილების მოწყობის სამუშაოები მიმდინარეობს. სოფელ ჭივჭავის საჯარო სკოლაში მიმდინარე სამუშაოს ადგილზე გაეცნო თეთრიწყაროს მუნიციპალიტეტის მერის პირველი მოადგილე მალხაზ სამაშვილი და საკრებულოს მაჟორიტარი დეპუტატი ჭივჭავის თემიდან დავით ხვისტანი. მალხაზ სამაშვილმა მერიის შესაბამისი სამსახურების თანამშრომლებთან ერთად ასევე მოინახულა სოფელ სამშვილდის საჯარო სკოლაში მიმდინარე სამუშაოები.

სველი წერტილები მოეწყობა და სანიტარულ-ჰიგიენური პირობები მოწესრიგდება ასევე, დაბა მანგლისის №1 საჯარო სკოლაში, დიდი თონეთის, წინწყაროს, ბოგვის და ერტისის საჯარო სკოლების შენობებში, ხოლო ალექსეევკის საჯარო სკოლას პარალელურად ჩაუტარდება სახურავის რეაბილიტაციის სამუშაოები. სველი წერტილები მოეწყობა და მეტალოპლასტმასის ფანჯრები დამონტაჟდება ქ. თეთრიწყაროს №2 საჯარო სკოლაში, ხოლო №1 სკოლის შენობაში საკლასო ოთახების კარებები შეიცვლება ახლით.

აღსანიშნავია, რომ მუნიციპალიტეტებს 2019 წლიდან გამოეყოთ თანხა საჯარო სკოლებში მცირე ინფრასტრუქტურული საჭიროებებისა და სარეაბილიტაციო სამუშაოებისათვის. თეთრიწყაროს მუნიციპალიტეტის საჯარო სკოლებში ჩატარებული მონიტორინგის შედეგად, გამოიკვეთა, რომ ზემოთ ხსენებულ სკოლებში არსებული სანიტარიულ-ჰიგიენური მდგომარეობა გადაუდებელ მოწესრიგებას საჭიროებდა და შესაბამისად, განისაზღვრა ჩასატარებელი სამუშაოები, რომლის განხორციელების შემდგომ, მოსწავლეები და პედაგოგები უზრუნველყოფილნი იქნებიან სანიტარიაზე ხელმისაწვდომობის პირობებით. სამუშაოების ღირებულება ჯამში 459 285 ლარს შეადგენს.