სიახლეების გამოწერა

მალე ქ. თეთრიწყაროს თანამედროვე სტანდარტების შესაბამისი, ახალი სპორტული მოედანი ექნება. ა.ა.ი.პ. თეთრიწყაროს განვითარების ფონდის დაკვეთით, მიმდინარეობს ე.წ. გარისის სტადიონის ტერიტორიაზე არსებული მოედნის სრული რეაბილიტაცია. რეკონსტრუქცია ჩაუტარდება ასევე ტრიბუნას, რომელიც გათვლილი იქნება 405 მაყურებელზე და დამონტაჟდება სკამები, აშენდება გასახდელები თავისი სველი წერტილებით, საზოგადოებრივი საპირფარეშო და ორი ადმინისტრაციული ოთახი.

მიმდინარე სამუშაოებს ადგილზე გაეცნო თეთრიწყაროს მუნიციპალიტეტის მერი გიორგი ქორიძე, ა.ა.ი.პ. თეთრიწყაროს განვითარების ფონდის დირექტორთან ლევან ლაბახუასთან ერთად.

პროექტის განხორციელების შედეგად, მოედანზე შესაძლებელი იქნება ეროვნული დონის სარაგბო და საფეხბურთო ტურნირების ჩატარება.

პროექტი, ასოციაცია სამხარეო განვითარება მომავალი საქართველოსათვის (RDFG)-ის და ააიპ თეთრიწყაროს განვითარების ფონდის მიერ, ევროკავშირის დაფინანსებით მიმდინარე, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში მიღებული გრანტით და თეთრიწყაროს მუნიციპალიტეტის მერიის თანადაფინანსებით ხორციელდება. ჯამური ინვესტიცია 259 958 ლარს შეადგენს. სამუშაოები მიმდინარე წლის ოქტომბრამდე დასრულდება.