სიახლეების გამოწერა

  გერმანელ კოლონისტთა ისტორიულ-კულტურული მემკვიდრეობა: საცხოვრებელი და სამეურნეო ნაგებობები, უნიკალური ღვინის მარანი, ლუთერანული ტაძარი, ძველი გერმანული არქიტექტურული სტილით ნაგები საცხოვრებელი სახლები და მხოლოდ ასურეთისთვის დამახასიათებელი, ადგილობრივი „ასურეთული შავი“ იგივე „შალა“ წელიწადის ყველა დროს აქ მოსულ ქართველ თუ უცხოელ სტუმრებზე წარუშლელ შთაბეჭდილებას ახდენს. 
ცნობილია, რომ ვაზის ამ სახეობას ქართული ნასოფლარის, - სამაჩვეთის მიმდებარე (ისტორიული სოფელი მდინარე ალგეთის ხეობაში, მდ. ასურეთისხევის მარცხენა მხარეს, ისტორიულ წყაროებში პირველად მოხსენიებულია XVII საუკუნის II ნახევარში) ტყეში მიაგნო გერმანელმა, გვარად შალლმა და მის პატივსაცემად, „შალა“ (ასურეთული შავი) უწოდეს. 
შალა საქართველოში მხოლოდ ასურეთში გვხვდება, რაც განპირობებულია შესაბამისი მიკროკლიმატური პირობებით, გეოგრაფიული მდებარეობით და ნიადაგის ნაყოფიერებით. სხვა ჯიშებთან შედარებით არის უხვმოსავლიანი, მიღებული ღვინო კი გამოირჩევა განუმეორებელი არომატით და ორიგინალურობით. ასურეთში მცხოვრები გერმანელი კოლონისტები სოფლიდან 7 კილომეტრში, მდინარე ალგეთის ნაპირებზე გაშენებული ვენახებიდან მიღებული მაღალი ხარისხის მოსავლის დაწურვას სპეციალურ მარანში ახორციელებდნენ, რომელსაც დღეს კულტურული მემკვიდრეობის ძეგლის სტატუსი აქვს მინიჭებული. ასურეთში წარმოებული ღვინის რეალიზაციისათვის სპეციალური მაღაზიები იყო გახსნილი თბილისში, ბაქოში და ერევანში. 
ასურეთში არსებულ უნიკალურ მატერიალურ ძეგლებთან ერთად, დღემდე შემორჩენილია ძველი გერმანული უნიკალური საოჯახო მარნები, სადაც ღვინის წარმოებისა და შენახვისათვის წელიწადის ყველა დროს ოპტიმალური ტემპერატურული რეჟიმია შენარჩუნებული. 
1881 წელს გემანელების მიერ აშენებულ საოჯახო მარანში, „ასურეთული შალას“ ნახევრად მშრალ, მშრალ და ნახევრად ტკბილ ღვინოს ევროპული ტექნოლოგიით აწარმოებს ადგილობრივი მეწარმე ალექსანდრე ჭიჭინაძე. ღვინის წარმოებისათვის ახლობლებთან ერთად შექმნა ამხანაგობა და წარმოების დაწყება სახელმწიფო პროგრამის „აწარმოე საქართველოში“ ფარგლებში მიღებული დახმარებით დაიწყო. მეწარმის სამომავლო გეგმებში შედის არსებული წარმოების გაფართოება და სადეგუსტაციო-სადემონსტრაციო სივრცის მოწყობაც, სადაც ტურისტებს საშუალება ექნებათ სოფელ ასურეთში მყუდრო და სასიამოვნო გარემოში, გასინჯონ ასურეთული შავის, იგივე შალას ჭაშნიკი და გაეცნონ ღვინის წარმოების პროცესს.
საკუთარ ვენახში მოყვანილი შალას ჯიშის ყურძნიდან აწარმოებს ღვინოს ადგილობრივი მეწარმე მამუკა ლაშხიც, ეტიკეტზე დატანილი წარწერა „ელიზაბეტთალი“ კი ადგილწარმოშობაზე და ასურეთში ღვინის წარმოების ტრადიციებზე მიუთითებს. ღვინოზე არსებული მოთხოვნის გათვალისწინებით, ადგილობრივ მეწარმეს დაგეგმილი აქვს წარმოების გაზრდა და არსებული ვენახის გაფართოება.
როგორც ადგილობრივი მეწარმეები აღნიშნავენ, ასურეთში არსებობს ღვინის ტურიზმის განვითარების დიდი შესაძლებლობები, აქ წარმოებული ღვინის პოპულარიზაცია კი ხელს შეუწყობს ცნობადობის გაზრდას და ექსპორტზე გატანას, ამასთანავე გაიზრდება მეწარმეთა ინტერესი ტრადიციული მევენახეობის დარგის აღორძინების მიმართულებით. 

მდიდარი მემკვიდრეობა, ღვინის წარმოების ტრადიციები, განვითარების დიდი შესაძლებლობები - ეს თეთრიწყაროს მუნიციპალიტეტის სოფელი ასურეთია.