სიახლეების გამოწერა

თეთრიწყაროს მუნიციპალიტეტის ადგილობრივი ეკონომიკური განვითარების გეგმის შემუშავების პროცესის სრულყოფილად წარმართვისათვის, გრძელდება აქტიური საკონსულტაციო შეხვედრები ადგილობრივ მეწარმეებთან. 
მერიის წარმომადგენლები სოფელ წინწყაროში ადგილზე გაეცნენ რძის პროდუქტების საწარმოო პროცესს და ადგილობრივი მეწარმისგან - მერაბ ძირკვაძისაგან, მოისმინეს ინფორმაცია ბიზნესის განვითარებისათვის არსებული საჭიროებების შესახებ. 
კოოპერატივი შპს „წინწყარო +“ ქართული ტრადიციული ტექნოლოგიით, ნატურალური რძის პროდუქტებს აწარმოებს. წარმოებული იმერული ყველის, სულგუნის და ყველის სხვა სახეობების, აგრეთვე ნადუღის რეალიზება თბილისში არსებულ დიდ სუპერმარკეტებში ხორციელდება. საწარმო არსებული შესაძლებლობებით დღის განმავლობაში უზრუნველყოფს დაახლოებით 10 ტონა რძის გადამუშავებას. მცირე საწარმოში დასაქმებულია 8 ადგილობრივი. 
სურსათის უვნებლობის HACCP სისტემის დასანერგად, მეწარმე აქტიურ კონსულტაციებს მართავს სხვადასხვა ორგანიზაციებთან. დაგეგმილი აქვს წარმოების გაფართოებაც, რაც ადგილზე დამატებითი სამუშაო ადგილების შექმნას უზრუნველყოფს.️️თეთრიწყაროს მუნიციპალიტეტის ადგილობრივი ეკონომიკური განვითარების გეგმის შემუშავება „მერები ეკონომიკური ზრდისთვის“ (M4EG) ევროკავშირის ინიციატივის ფარგლებში ხორციელდება. თეთრიწყაროს მუნიციპალიტეტის მერია ინიციატივას 2018 წლიდან შეუერთდა. პროგრამა მიზნად ისახავს ევროკავშირის მიერ აღმოსავლეთ პარტნიორობის ქვეყნებში (EaP) ეკონომიკური განვითარების და ახალი სამუშაო ადგილების შექმნისათვის ადგილობრივი ხელისუფლების მხარდაჭერას.