სიახლეების გამოწერა

    თეთრიწყაროს მუნიციპალიტეტის პოპულარიზაციისა და ქალაქ თეთრიწყაროს მხარეთმცოდნეობის მუზეუმის შემდგომი განვითარების საკითხები განიხილეს 12 აპრილს გამართულ შეხვედრაზე, საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ანთიძემ, მოადგილემ დავით ლომიტაშვილმა, საგენტოს წარმომადგენლებმა: ირმა დოლიძემ, დიმიტრი ნარიმანაშვილმა, თეთრიწყაროს მუნიციპალიტეტის მერის მოადგილეებმა, თანამშრომლებმა და ააიპ „თეთრიწყაროს მხარეთმცოდნეობის მუზეუმი“-ს წარმომადგენლებმა.

  ნიკოლოზ ანთიძემ აუდიტორიას გააცნო კულტურული მემკვიდრეობის სააგენტოს მუშაობის ძირითადი მიმართულებები და მხარეთმცოდნეობის მუზეუმის სააგენტოსათვის სარგებლობის უფლებით გადაცემის შემთხვევაში სამომავლოდ გასატარებელი ღონისძიებები, რომელებიც მოიცავს ექსპონატების ინვენტარიზაციას, შენობის რეაბილიტაციას და აღჭურვას თანამედროვე სტანდარტების შესაბამისად, ადგილობრივი კადრების გადამზადებას და სხვა ღონისძიებებს. 

  კულტურული მემკვიდრეობის სააგენტოს წარმომადგენლების ინფორმაციით, თეთრიწყაროს მხარეთმცოდნეობის მუზეუმში განთავსდება სამშვილდისა და კლდეკარის მუზეუმ-ნაკრძალის ადმინისტრაციულ-საექსპოზიციო სივრცე, არქეოლოგიური მასალა და გახდება კულტურული მემკვიდრეობის სფეროს ერთ-ერთი ქმედითი დაწესებულება, საერთაშორისო დონეზე სამუზეუმო საქმიანობასთან ერთად დაწესებულება განახორციელებს წალკისა და თეთრიწყაროს მუნიციპალიტეტებისა და მათ მიმდებარე ტერიტორიებზე არსებული კულტურული მემკვიდრეობის სისტემატურ მონიტორინგს, მდგომარეობის ფიქსაციასა და რეაბილიტაციისათვის საჭირო ღონისძიებების დაგეგმვას. მუზეუმს სამომავლოდ ექნება სრულიად განახლებული ექსპოზიცია, მოეწყობა მასშტაბური გამოფენები და კულტურულ-საგანმანათლებლო ღონისძიებები, რაც ხელს შეუწყობს მუზეუმის პოპულარიზაციას, თეთრიწყაროს მუნიციპალიტეტში ტურიზმის განვითარებას და ქალაქი თეთრიწყარო გადაიქცევა რეგიონის ტურისტულ ცენტრად.

   შეხვედრის დასრულების შემდგომ ნიკოლოზ ანთიძემ დაათვალიერა თეთრიწყაროს მხარეთმცოდნეობის მუზეუმში დაცული ექსპონატები და გაეცნო თანამშრომლებს. თეთრიწყაროს მხარეთმცოდნეობის მუზეუმი დაარსდა 1965 წელს, მუზეუმში ინახება დაახლოებით 11000 ექსპონანტი, მათ შორის ეთნოგრაფიული, არქეოლოგიური და XX საუკუნის ისტორიის ამსახველი მასალები. მუზეუმში დაცულია ძვ.წ.აღ-ის IV-III ათასწელულის რომის კეისრის ფულის მულაჟები, რომელიც ადასტურებს ამ პერიოდში საქართველოს სავაჭრო ურთიერთობის არსებობას სხვა ქვეყნებთან.