სიახლეების გამოწერა

დღეს, სოფელ ასურეთში, აფხაზეთის ომის დროს ბაბუშერას აეროპორტთან დატრიალებული ტრაგედიის შედეგად დაღუპული მებრძოლები გაიხსენეს და მათ ხსოვნას პატივი მიაგეს.

ბაბუშერას ტრაგედიიდან 24 წელი გავიდა. 1993 წლის 22 სექტემბერს, საღამოს 6-ის ნახევარზე, თვითმფრინავი, რომლის ბორტზეც სამხედრო პოლიციის თანამშრომლები, სპეცდანიშნულების რაზმის წევრები, გვარდიის მებრძოლები, მოხალისეები, ექთნები და სამოქალაქო პირები იყვნენ, ბაბუშერას აეროპორტთან, ზღვიდან ნასროლი სითბური რაკეტით ჩამოაგდეს. თვითმფრინავში 132 ადამიანი იყო, რომელთაგან 108 დაიღუპა.

საბედისწერო რეისის მგზავრებს შორის შვიდი მებრძოლი იყო სოფელ ასურეთიდან : ძმები - სოსო და კობა გურგენიძეები, მათი ბიძაშვილი როსტომ გურგენიძე, ხვიჩა კაციტაძე, ჯუმბერ (ელგუჯა) გოცირიძე, ბესიკ მურუსიძე და დათო ავალიანი.

დაღუპულთა სულის მოსახსენიებელი პანაშვიდი გადაიხადა ასურეთის ტაძრის მოძღვარმა მამა შენგელი გოცირიძემ. პანაშვიდს ესწრებოდნენ გარდაცვლილთა ოჯახის წევრები, ადგილობრივი თვითმმართველობის წარმომადგენლები და მოსახლეობა. 
თეთრიწყაროს მუნიციპალიტეტის გამგეობის მიერ, დაღუპულთა ოჯახებზე გაიცა ფულადი დახმარება 500 ლარის ოდენობით.