სიახლეების გამოწერა

ქალაქ თეთრიწყაროში სასმელი წყლის 2 ჭაბურღილის მოწყობის სამუშაოები მიმდინარეობს. საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანიის დაკვეთით, ქ. თეთრიწყაროში, მოსახლეობის სასმელ-საყოფაცხოვრებო წყალმომარაგების რეჟიმის გაუმჯობესების მიზნით, ვარხუნოს რეზერვუარის მიმდებარე ტერიტორიაზე დამატებით, 2 ჭაბურღილი მოეწყობა. პროექტის განხორციელების შედეგად, გაიზრდება სასმელი წყლის დებეტი და ქ. თეთრიწყაროში მცხოვრები 3100-მდე ბენეფიციარი ისარგებლებს გაუმჯობესებული წყალმომარაგებით. პროექტით გათვალისწინებული სამუშაოების ძირითადი ნაწილი ამ ეტაპზე დასრულებულია, მიმდინარეობს გაწმენდითი სამუშაოები. 
ამასთანავე, წყალმომარაგების კომპანიის მიერ, ხორციელდება საპროექტო სამუშაოები დაბა მანგლისში სასმელი წყლის დებეტის გაზრდის და მოსახლეობის წყალმომარაგების გაუმჯობესებისათვის, მიმდინარე წელს დაგეგმილია მანგლისის საყოფაცხოვრებო აბონენტების გამრიცხველიანებაც. 
აღსანიშნავია, რომ 2015-2016 წლებში გაერთიანებული წყალმომარაგების კომპანიის და მუნიციპალური განვითარების ფონდის მიერ ევროპის საინვესტიციო ბანკის დაფინანსებით, ქ. თეთრიწყაროში წყალმომარაგების სისტემის სარეაბილიტაციოდ, 2 მილიონი ლარის ღირებულების სამუშაოები განახორციელდა. წყლის ინფრასტრუქტურის რეაბილიტაციის შედეგად, შემცირდა წყლის დანაკარგები და გაუმჯობესდა როგორც სასმელი წყლის ხარისხი, ასევე მიწოდების გრაფიკი.