სიახლეების გამოწერა

საქართველოს ბავშვთა და მოსწავლე ახალგაზრდობის სპორტის ეროვნულმა ფედერაციამ, საქართველოს სპორტისა და ახალგაზრდობის საქმეთა და საქართველოს განათლებისა და მეცნიერების სამინისტროებთან ერთად, საქართველოს ოლიმპიური კომიტეტის მხარდაჭერით, 2015 წლის თებერვალ - ივლისში განახორციელა მასშტაბური სასკოლო სპორტული ოლიმპიადის საპილოტე პროექტი, რომელიც მიზნად ისახავდა საქართველოში სასკოლო სპორტის განვითარებას და ზოგადად სპორტში მოსწავლე ახალგაზრდების მასობრივ ჩართვას.

2016 წლის 20 თებერვალს დაიწყო სასკოლო სპორტული ოლიმპიადის მეორე მუნიციპალური ტური, რომელიც მიზნად ისახავს, სასკოლო სპორტულ ოლიმპიადაში სპორტის ოთხ სახეობაში (მინი ფეხბურთი, კალათბურთი, ფრენბურთი და გეზრბენი) გამარჯვებული სპორტული გუნდების გამოვლენას რეგიონულ ტურნირზე გასამგზავრებლად. აღნიშნულ პროექტში მონაწილეობას იღებს თეთრიწყაროს მუნიციპალიტეტის რვა საჯარაო სკოლის 28 სპორტული გუნდი.
20 თებერვალს თეთრიწყაროს მუნიციპალიტეტის გამგეობის მხარდაჭერით და ორგანიზებით ქ.თეთრიწყაროში N 1 საჯარო სკოლის სპორტულ დარბაზში გაიმართა შესარჩევი ტური ფრენბურთსა და კალათბურთში, შედეგად გამოვლინდა გამარჯვებული გუნდები (ფრენბურთში- ქ.თეთრიწყაროს N1 საჯარო სკოლის ვაჟთა და გოგონათა გუნდები, ხოლო კალათბურთში ქ.თეთრიწყაროს N1 საჯარო სკოლის ვაჟთა და მანგლისის საჯარო სკოლის გოგონათა გუნდები). შემდეგი შესარჩევი ტური გაიმართება მინიფეხბურთსა და გეზრბენში.
თეთრიწყაროს მუნიციპალიტეტის გამგეობა წარმატებებს უსურვებს სასკოლო სპორტულ ოლიმპიადაში მონაწილე მოსწავლე ახალგაზრდობას.