სიახლეების გამოწერა

12 თებერვალს თეთრიწყაროს მუნიციპალიტეტში  საქართველოს ფოლკლორის სახელმწიფო ცენტრის წარმომადგენლობა და სალოტბარო სკოლა გაიხსნა. ურთიერთთანამშრომლობის მემორანდუმს ხელი მოაწერეს საქართველოს ფოლკლორის სახელმწიფო ცენტრის აღმასრულებელმა დირექტორმა გიორგი დონაძემ და თეთრიწყაროს მუნიციპალიტეტის გამგებელმა ბესიკ წიკლაურმა.

სალოტბარო სკოლაში მოსწავლეები, საქართველოს ფოლკლორის სახელმწიფო ცენტრის სპეციალური პროგრამით, უფასოდ შეისწავლიან ქართულ ხალხურ სიმღერასა და ტრადიციულ გალობას. სკოლის დამთავრების შემდეგ კი წარჩინებული მოსწავლეები სწავლას გააგრძელებენ თბილისის გიორგი მთაწმინდელის სახელობის უმაღლეს სასწავლებელში.
კულტურის სახლში გამართულ სადღესასწაულო ღონისძიებას ესწრებოდნენ თეთრიწყაროს მუნიციპალიტეტის გამგებელი ბატონი ბესიკ წიკლაური,თეთრიწყაროს მუნიციპალიტეტის საკრებულოს თავმჯდომარე ბატონი გოჩა თედორაძე, ფოლკლორის სახელმწიფო ცენტრის აღმასრულებელი დირექტორი გიორგი დონაძე,ფოლკლორის ცენტრის ზეპირსიტყვიერების ხელმძღვანელი ქალბატონი ეთერ თათარაიძე, ცენტრის სპეციალისტები, კულტურის სფეროსა და ადგილობრივი ხელისუფლების წარმომადგენლები.
კონცერტზე გაჟღერდა ქართული, ხალხური სიმღერები და საგალობლები, რომლებიც ანსამბლმა "ლაგუშედას" და „გუდარეხის“მომღერლებმა შეასრულეს.