სიახლეების გამოწერა

20 თებერვალს თეთრიწყაროს მუნიციპალიტეტის გამგებელი ბესიკ წიკლაური ლტოლვილთა დანიის საბჭოს პროექტის წარმომადგენლებს შეხვდა. შეხვედრის მიზანს იძულებით გადაადგილებულ პირთა- დევნილთა სოციალურ-ეკონომიკური ინტეგრაციის ხელშეწყობა და მათი დასაქმების, მომსახურებისა და საცხოვრებელი პირობების გაუმჯობესებისკენ მიმართული პროგრამების შემუშავება წარმოადგენდა. შეხვედრაზე ბესიკ წიკლაურმა ისაუბრა თეთრიწყაროს მუნიციპალიტეტის ტერიტორიაზე მცხოვრებ იძულებით გადაადგილებულ პირთა პრობლემებსა და საჭიროებებზე, მათი მოგვარების გზებზე, ადგილობრივი ხელისუფლების მხრიდან პროცესების ხელშეწობასა და აქტიურ თანამშრომლობაზე. საქართველოში დაახლოებით 273 000 იძულებით გადაადგილებული პირია რეგისტრირებული, რომელთა უმეტესობამ 90-იან წლებში იძულებით დატოვა საცხოვრებელი ადგილი. საქართველოს მთავრობამ დევნილთა პრობლემებისა და საჭიროებების აღმოფხვრის მიზნით განახორციელა მთელი რიგი ღონისძიებები, მათ შორის საერთაშორისო საზოგადოების მხარდაჭერით, მიუხედავად ამისა, დევნილები კვლავ მრავალი სოციალური და ეკონომიკური გამოწვევის წინაშე დგანან და არ აქვთ სრულყოფილი ხელმისაწვდომობა ადგილობრივ სერვისებზე, რაც დევნილთა განსახლების ადგილებში მათი ინტეგრირების პროცესს აფერხებს. აქედან გამომდინარე პროექტის მიზანია ხელი შეუწყოს დევნილთა გრძელვადიან, სრულყოფილ ინტეგრაციასა და მათი უფლებების სათანადოდ დაცვას, დევნილი საზოგადოების გაძლიერებისა და ადგილობრივი მუნიციპალიტეტებისა და სხვა პასუხისმგებელი უწყებების შესაძლებლობების ზრდის გზით. შეხვედრას ესწრებოდნენ: თეთრიწყაროს მუნიციპალიტეტის გამგებელი ბესიკ წიკლაური,გამგებლის მოადგილე ლია ზურებიანი,ლტოლვილთა დანიის საბჭოს სამხრეთ კავკასიის წარმომადგენლობის ხელმძღვანელი ვინსენტ დონტო,სამთავრებო უწყებებთან ურთიერთობის კოორდინატორი ნინო ხოხობაია და პროექტის ოფიცერი ლევან ხვიჩია.