სიახლეების გამოწერა

 26 იანვარს „მწვანე კავკასია“-ს მიერ გამართულ კონფერენციაზე საპილოტე პროექტის „თანამონაწილეობითი დაგეგმვა ურბანულ დასახლებაში“ შედეგების პრეზენტაცია გაიმართა, რომლის მხარდამჭერი იყო ფონდი „ღია საზოგადოება საქართველო“. ორგანიზაციის ხელმძღვანელმა გიორგი აბულაძემ საზოგადოებას წარუდგინა მოქალაქეებისა და ადგილობრივი ხელისუფლების მიერ ერთობლივად შემუშავებული საპროექტო წინადადება , რომელიც ქ.თეთრიწყაროს ცენტრალურ უბანში სარეკრეაციო ზონის რეაბილიტაციას ითვალისწინებს. შეხვედრაზე მიწვეულნი იყვნენ : ქვემო ქართლში სახელმწიფო რწმუნებულ-გუბერნატორი პაატა ხიზანაშვილი, თეთრიწყაროს მუნიციპალიტეტის გამგებლის პირველი მოადგილე ერეკლე კუხიანიძე, ფონდი "ღია საზოგადოების" წარმომადგენლები და სხვა. ქვემო ქართლში სახელმწიფო რწმუნებულ-გუბერნატორმა პაატა ხიზანაშვილმა სრული მხარდაჭერა გამოუცხადა საპროექტო წინადადების განხორციელებას და ისაუბრა გადაწყვეტილების პროცესში მოსახლეობის ჩართულობის აპრობირებული ინსტრუმენტების სხვა მუნიციპალიტეტებისათვის გაზიარების აუცილებლობაზე. ერეკლე კუხიანიძემ ისაუბრა თეთრიწყაროს მუნიციპალიტეტის განვითარების პერსპექტივებზე და მოქალაქეთა თვითორგანიზაციის სხვადასხვა ფორმების დანერგვაში ადგილობრივი ხელისუფლების როლზე. ორგანიზაციის ხელმძღვანელმა გიორგი აბულაძემ შეხვედრის მონაწილეებს გააცნო პროექტის „თანამონაწილეობითი დაგეგმვა ურბანულ დასახლებაში“ განხორციელების ეტაპები და მიღწევები. პროექტი ითვალისწინებს სარეკრეაციო ზონის რეაბილიტაციას, ქალაქ თეთრიწყაროს ცენტრალურ უბანში ჭავჭავაძის ჩიხისა და და ფარნავაზის ქუჩას შორის მდებარე უფუნქციო ტერიტორიაზე ხელოვნური წყალსატევისა და მის გარშემო დასასვენებელი ზონის მოწყობას.