სიახლეების გამოწერა

2015 წლის 18 მაისის N996 მთავრობის განკარგულების საფუძველზე, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ თეთრიწყაროს მუნიციპალიტეტში მოახდინა სახელმწიფო საკუთრებაში არსებული (სამინისტროს ბალანსზე რიცხული), სტიქიური მოვლენების შედეგად დაზარალებული ეკომიგრანტი ოჯახების საცხოვრებელი სახლებისა და მათთან ერთად შესყიდული მიწის ნაკვეთების აზომვითი ნახაზების მომზადება, შემდგომში ეკომიგრანტი ოჯახებისათვის საკუთრებაში გადაცემის მიზნით.

ამავე პროექტის ფარგლებში მოხდა ზემოაღნიშნულ საცხოვრებელ სახლებში განსახლებული ოჯახების აღწერა/პროფაილინი, რაც ადგილზე (სოფლებში) განხორციელდა მუნიციპალიტეტის გამგეობის  წარმომადგენლებთან ერთად.
საქართველოს მთავრობის 2016 წლის 7 მარტის N 384 განკარგულების შესაბამისად, თეთრიწყაროს მუნიციპალიტეტში მცხოვრებ, სტიქიური მოვლენების შედეგად დაზარალებულ  73 ეკომიგრანტ ოჯახს  საცხოვრებელი სახლი და მასთან ერთად  შესყიდული მიწის ნაკვეთი საკუთრებაში გადაეცემათ პირდაპირი მიყიდვის ფორმით, სიმბოლურ ფასად - 1 (ერთი) ლარად, ხოლო კანონმდებლობით გათვალისწინებული შესაბამისი ღონისძიებების განხორციელებას უზრუნველყოფს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო.
მიმდინარე წლის 25 აპრილიდან 29 აპრილის ჩათვლით, სამინისტროს წარმომადგენლების მიერ მოხდება ნასყიდობის ხელშეკრულების გაფორმება თეთრიწყაროს მუნიციპალიტეტში მცხოვრებ 73 ეკომიგრანტ ოჯახთან. მუნიციპალიტეტის გამგებლის ბესიკ წიკლაურის გადაწყვეტილებით, აღნიშნული პროცედურის უზრუნველყოფის მიზნით, გამგეობის შენობაში გამოიყოფა სპეციალური ფართი.
გთხოვთ, გამოცხადდეთ მითითებულ დროს  გამგეობის შენობაში ნასყიდობის ხელშეკრულებაზე და მიღება - ჩაბარების აქტებზე ხელმოსაწერად (მის: ქ. თეთრიწყარო, თამარ მეფის 34).
დამატებით გაცნობებთ, რომ, თუ დანართში მითითებული პირები (ოჯახები) ვერ შეძლებენ გამგეობაში გამოცხადებას, ოჯახები ვალდებულები იქნებიან მიბრძანდნენ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში (მის. ქ. თბილისი, თამარაშვილის 15 ა) მიმდინარე წლის 7 ივნისამდე.