სიახლეების გამოწერა

წვევამდელთა ეროვნულ სამხედრო სამსახურში საკუთარი სურვილით დარეგისტრირებულ ახალგაზრდას ნიკოლოზ ჩიტუაშვილს, სამხედრო აღრიცხვის, გაწვევისა და რეკრუტირების, თეთრიწყაროს მუნიციპალური განყოფილების უფროსმა, ზურაბ როსტიაშვილმა სიმბოლურად, წახალისების მიზნით, მეფე ერეკლე II-ის გამოსახულებით კოინი გადასცა.

პირველ ეტაპზე ახალგაზრდები გაივლიან საწყისი საბრძოლო მზადების კურსს (BCT).

საქართველოს თავდაცვის კოდექსის თანახმად, 2025 წლიდან წვევამდელთა ეროვნულ სამხედრო სამსახურში გასაწვევად წვევამდელთა შერჩევა განხორციელდება ყოველწლიური შემთხვევითი შერჩევის პრინციპის საფუძველზე;

წვევამდელთა ეროვნული სამხედრო სამსახურის გავლა შესაძლებელია მხოლოდ საქართველოს თავდაცვის სამინისტროს სისტემაში;

წვევამდელთა ეროვნული სამხედრო სამსახურის ვადები და ანაზღაურება:

საბრძოლო ქვედანაყოფში სამსახურისთვის − 6 თვის ვადით - 765 ლარის ოდენობით;

საბრძოლო მხარდაჭერისა და საბრძოლო უზრუნველყოფის ქვედანაყოფში სამსახურისთვის − 8 თვის ვადით - 635 ლარის ოდენობით;

უმცროს სამეთაურო თანამდებობაზე და წინასწარ განსაზღვრული სპეციალობით სამსახურისთვის − 11 თვის ვადით სერჟანტებისთვის - 1275 ლარის, ხოლო ოფიცრებისთვის - 1530 ლარის ოდენობით.

11-თვიანი სამსახურის დასრულების შემდეგ, აღნიშნული პირები ჩაირიცხებიან რეზერვში.

წვევამდელთა ეროვნულ სამხედრო სამსახურში ნებაყოფლობით, საკუთარი სურვილით გაწვეულ პირს წვევამდელთა ეროვნულ სამხედრო სამსახურში დაწესებული ანაზღაურება მიეცემა 30 პროცენტით მეტი ოდენობით.

თეთრიწყაროს მუნიციპალიტეტის მერმა, გიორგი წიკლაურმა, სამხედრო აღრიცხვის, გაწვევისა და რეკრუტირების თეთრიწყაროს მუნიციპალური განყოფილების უფროსმა ზურაბ როსტიაშვილმა და წვევამდელთა ოჯახის წევრებმა, ახალგაზრდები ეროვნულ სამხედრო სამსახურში გააცილეს და მშვიდობით დაბრუნება უსურვეს.