სიახლეების გამოწერა

დაბა მანგლისში გაზიფიცირებისათვის საჭირო სამშენებლო სამუშაოების განხორციელება  აქტიურად მიმდინარეობს.

საქართველოს გაზის ტრანსპორტირების კომპანიის მიერ, მთავრობის შესაბამისი განკარგულების საფუძველზე, პროექტის მიხედვით აშენდება 34 150 გრძივი მეტრის მკვებავი და მოეწყობა 48 273 გრძივი მეტრი გაზსადენის ქსელი. (დაბა მანგლისში უკვე მოწყობილია გაზსადენის ქსელი, მიმდინარეობს მკვებავის მოწყობა) მანგლისში მცხოვრებ 1 558 აბონენტს საშუალება მიეცემა ისარგებლოს ბუნებრივი აირით. სამუშაოების სახელშეკრულებო  ღირებულება 11 მილიონ 500 ათას ლარს შეადგენს.

აღსანიშნავია, რომ მოსახლეობის ერთ-ერთ უმნიშვნელოვანეს პრობლემას წლების განმავლობაში ბუნებრივი აირის არ არსებობა წარმოადგენდა. ბუნებრივი აირით მომარაგება ხელს შეუწყობს დაბა მანგლისის როგორც ქვეყნის ერთ-ერთი მნიშვნელოვანი კურორტის განვითარებასა და აქტიურ ტურისტულ ზონად გადაქცევას. სამუშაოები მიმდინარე წლის აპრილში დაიწყო და დასრულება ხელშეკრულებით გათვალისწინებულია 2021 წლის 10 მაისს.

ამასთანავე, საქართველოს მთავრობის №791 განკარგულების მიხედვით, საქართველოს მოსახლეობის ბუნებრივი გაზით მომარაგების ხელშეწყობისათვის 2019-2021 წლებში გათვალისწინებულია სოფლების: ჩხიკვთა, ჭივჭავი, მაწევანი, ტბისი, გოლთეთი, აბელიანი, დაღეთი, ასურეთის აგარაკები, ზემო წყლულეთი გაზიფიცირებისათვის საჭირო  წინასაპროექტო კვლევების განხორციელება.

დამატებითი ინფორმაცია იხილეთ მითითებულ ბმულზე: http://gov.ge/files/71126_71126_883103_524_71126_308426_791.pdf