სიახლეების გამოწერა

19 ნოემბერს, ცენტრალური და ადგილობრივი ხელისუფლების წარმომადგენლებმა თეთრიწყაროს მუნიციპალიტეტის სოფლებში: ბორბალო, ღოუბანი და ერტისი მოსახლეობასთან შეხვედრები გამართეს და პირადად გაეცნენ თითოეულ დასახლებაში არსებულ საჭიროებებს.

სოფელ ღოუბნის მოსახლეობამ პრიორიტეტულ საკითხად მისასვლელი საავტომობილო გზის რეაბილიტაცია/გაფართოება და სარიტუალო დარბაზის მოწყობა დაასახელა, ბორბალოს მოსახლეობამ - მისასვლელი საავტომობილო გზის რეაბილიტაცია, სასმელი წყლის მიწოდების გაუმჯობესება და ამბულატორიის რემონტი, ხოლო ერტისის მოსახლეობამ მთავარ საჭიროებად შიდა გზების მოწყობა დაასახელა.

მნიშვნელოვანია, რომ ღია შეხვედრების ფარგლებში მიღებული ინფორმაციის საფუძველზე, ადგილობრივი მოსახლეობის საყოფაცხოვრებო პირობების გაუმჯობესების მიზნით, დაიგეგმება ღონისძიებები, რომელიც ასახული იქნება მომავალი წლების სამოქმედო გეგმაში.

შეხვედრას ესწრებოდნენ: თეთრიწყაროს მაჟორიტარი დეპუტატი გოდერძი ჩანქსელიანი, თეთრიწყაროს მუნიციპალიტეტის საკრებულოს თავმჯდომარე გოჩა თედორაძე, მერის მოადგილეები: მალხაზ სამაშვილი და ბერდია ხვისტანი, საკრებულოს თავმჯდომარის მოადგილე ავთანდილ მუხაშავრია.