სიახლეების გამოწერა

საქართველოს რეგიონული განვითარებისა და ინფრასტრუქტურის სამინისტროს ადმინისტრაციული დეპარტამენტის შესყიდვების სამმართველოს უფროსი ოთარ არევაძე, ქვემო ქართლში სახელმწიფო რწმუნებულის პირველი მოადგილე ზვიად ჭუნაშვილი, თეთრიწყაროს მუნიციპალიტეტის მერი გიორგი ქორიძე და მერის მოადგილეები: მალხაზ სამაშვილი და ბერდია ხვისტანი, სოფლის ამბულატორიების რეაბილიტაციის და საჯარო სკოლებში სანიტარულ-ჰიგიენური პირობების მოწესრიგების მიზნით მიმდინარე სამუშაოებს ადგილზე გაეცნენ. სოფლად მოსახლეობის პირველადი ჯანდაცვის მომსახურების სერვისის სრულყოფისა და ხელმისაწვდომობის გაზრდის მიზნით, მიმდინარეობს სოფელ კოდის, ბორბალოს, ვაშლოვნის და ორბეთის ამბულატორიების შენობების რეაბილიტაცია. მიმდინარე წლის ბოლომდე დასრულდება, ახალი ამბულატორიის მშენებლობა სოფელ პანტიანში. ხსენებული პრექტების განხორციელებისათვის სახელმწიფო ბიუჯეტიდან გამოყოფილია 178 327 ლარი.

2019 წლის განმავლობაში, სანიტარულ-ჰიგიენური პირობები მოწესრიგდება თეთრიწყაროს მუნიციპალიტეტის 11 საჯარო სკოლაში, ახალი სასწავლო წლის დაწყებამდე, დაბა მანგლისის №1 საჯარო სკოლაში, დიდი თონეთის, წინწყაროს, ბოგვის, ერტისის, ირაგის, ალექსეევკის, ჭივჭავისა და სამშვილდის საჯარო სკოლების შენობებში მოეწყობა და მოწესიგდება სველი წერტილები, ხოლო ალექსეევკის საჯარო სკოლას პარალელურად ჩაუტარდება სახურავის რეაბილიტაციის სამუშაოები. სველი წერტილები ასევე მოეწყობა და მეტალოპლასტმასის ფანჯრები დამონტაჟდება ქ. თეთრიწყაროს №2 საჯარო სკოლაში, ხოლო №1 სკოლის შენობაში საკლასო ოთახების კარებები შეიცვლება ახლით. აღსანიშნავია, რომ ხსენებულ სკოლებში არსებული სანიტარიულ-ჰიგიენური მდგომარეობა გადაუდებელ მოწესრიგებას საჭიროებდა. შესაბამისი სამუშაოების განხორციელების შემდგომ, მოსწავლეები და პედაგოგები უზრუნველყოფილნი იქნებიან სანიტარიაზე ხელმისაწვდომობის პირობებით. სკოლებში ჩასატარებელი სამუშაოების ჯამური ღირებულება (ხელშეკრულების მიხედვით) 459 285 ლარს შეადგენს. პროექტები დაფინანსებულია სახელმწიფო ბიუჯეტიდან.