სიახლეების გამოწერა

12 ნოემბერს თეთრიწყაროს მუნიციპალიტეტის გამგეობის სააქტო დარბაზში ალგეთის ეროვნული პარკის მრჩეველთა საბჭოს მორიგი სამუშაო შეხვედრა გაიმართა. შეხვედრის მიზანს ეროვნული პარკის საზღვრების დემარკაციის საკითხის განხილვა წარმოადგენდა.

შეხვედრას უძღვებოდა თეთრიწყაროს მუნიციპალიტეტის გამგებელი ბესიკ წიკლაური, SPPA-საქართველოს (დაცული ტერიტორიების მხარდაჭერის პროგრამა კავკასიაში) წარმომადგენელი რამაზ გოხელაშვილი და ალგეთის ეროვნული პარკის ადმინისტრაციის ხელმძღვანელი ავთანდილ მჭედლიძე. შეხვედრას ესწრებოდნენ ადგილობრივი ხელისუფლების ხელმძღვანელი პირები, მრჩეველთა საბჭოს წევრები და შპს „გეოგრაფიკი“-ს მოწვეული კონსულტანტები.
საბჭომ მოისმინა დემარკაციის სამუშაოების შედეგები, იმსჯელა დემარკაციის საკითხთან დაკავშირებული მოსაზრებების და შემოთავაზებული ცვლილებების შესახებ და საერთო კონსესუსით მიიღო გადაწყვეტილება, კერძოდ; 
ეროვნული პარკის არსებულ საზღვრებში შემავალი სოფლების საძოვრები შევა ეროვნული პარკის საზღვრებში, მოსახლეობის მხრიდან ტრადიციული გამოყენების პირობით, ეროვნული პარკის აღმოსავლეთით ტყის სამი ფრაგმენტი (საერთო ფართობით 142 ჰა) ტყის მასივის შენარჩუნების მიზნით, დარჩება ალგეთის ეროვნული პარკის საზღვრებში, პარკის საზღვრებიდან ამოირიცხება ყველა დარეგისტრირებული სასოფლო-სამეურნეო მიწის ნაკვეთი და სოფლამდე მისასვლელი საავტომობილო გზები.
აღსანიშნავია, რომ ალგეთის ეროვნული პარკის საბჭო სათათბირო ორგანოა, რომელიც შექმნილია დაცული ტერიტორიების ინტეგრალური მართვის მიზნით. მისი ძირითადი საქმიანობის სფეროს წარმოადგენს საზოგადოების ჩართულობის მექანიზმის გაუმჯობესება და რეკომანდაციების შემუშავება დაცული ტერიტორიების და ბუნებრივი ფასეულობების სრულყოფილი მართვის მიზნით. საბჭო 14 წევრისაგან შედგება, მის შემადგენლობაში შედიან: ადგილობრივი ხელისუფლების წარმომადგენლები, ალგეთის ეროვნული პარკის ადმინისტრაციის ხელმძღვანელი და ადგილობრივი თემის წარმომადგენლები.