სიახლეების გამოწერა

2004 წლის 24 სექტემბერს საქართველოში ახალი აგრარული ტექნოლოგიების და საინფორმაციო-საკონსულტაციო სერვისის დანერგვის მიზნით, შეიქმნა არასამთავრობო ორგანიზაცია კავშირი „აგროსერვისი“.

2004 წლიდან დღემდე, სხვადასხვა დონორისა და პარტნიორების დაფინანსებით განხორციელდა 15-მდე აგრარული პროექტი, გამოიცა რამოდენიმე წიგნი და საინფორმაციო ბროშურა სოფლის მეურნეობის თანამედროვე ტექნოლოგიების შესახებ. ამჟამად, ორგანიზაცია არის Mercy Corps-international Georgia კონსორციუმის წევრი და ქვემო ქართლის რეგიონში მონაწილეობს ENPARD-ის პროგრამის განხორციელებაში.
პროექტის ფარგლებში თეთრიწყაროს მუნიციპალიტეტში მცირე მიწიან ფერმერებისთვის ახალი მრავალრენტაბელური კულტურების მოყვანის თანამედროვე მეთოდების დანერგვა-გავრცობის ხელშეწყობის მიზნით, “აგროსერვისს” დაგეგმილი აქვს UNPD - ის მიერ გამოცხადებულ მცირე გრანტების პროგრამაში მონაწილეობა. პროექტი ითვალისწინებს მუნიციპალიტეტის ტერიტორიაზე შერჩეული ბენეფიციარებისათვის თანამედროვე სისტემების გამოყენებით, კენკროვანი და ბოსტნეული კულტურების სასწავლო - სადემონსტრაციო ნაკვეთების მოწყობას. აღსანიშნავია, რომ სასწავლო სადემონსტრაციო ნაკვეთების ორგანიზების ხარჯებს დააფინანსებს UNPD და საჩუქრად გადასცემს მეპატრონეებს. პროექტის ფარგლებში ფერმერებს ჩაუტარდებათ კონსულტაციები და ტრენინგები, გადაეცემათ სპეციალურად შემუშავებული სახელძღვანელო. პროექტში ჩართული იქნება თეთრიწყაროს მუნიციპალიტეტის გამგეობა და სოფლის მეურნეობის სამინისტროს თეთრიწყაროს საინფორმაციო-საკონსულტაციო სამსახური.
პროექტის მხარდაჭერის მიზნით, „აგროსერვისი“-ს წარმომადგენელი ირაკლი ჯავახიშვილი გამგეობაში შეხვდა თეთრიწყაროს მუნიციპალიტეტის გამგებელს ბესიკ წიკლაურს. შეხვედრას ესწრებოდნენ: გამგებლის პირველი მოადგილე ერეკლე კუხიანიძე, სოფლის მეურნეობის და ეკონომიკის განვითარების ხელშეწყობის სამსახურის უფროსი ვალერიან სუხიტაშვილი და თეთრიწყაროს სანფორმაციო-საკონსულტაციო ცენტრის სპეციალისტი ირმა კოპაძე.