სიახლეების გამოწერა

 23 მარტს თეთრიწყაროს მუნიციპალიტეტის მერიაში ევროკავშირის მიერ დაფინანსებული პროექტის „ევროკავშირის წყლის ინიციატივა პლუს აღმოსავლეთის პარტნიორობისათვის“ ფარგლებში, ადგილობრივი ხელისუფლების და პროექტის წარმომადგენლების მონაწილეობთ, პირველი სამუშაო შეხვედრა გაიმართა. პროექტი მიზნად ისახავს წყლის რესურსების, კერძოდ ტრანსსასაზღვრო მდინარეების, მათ შორის მდინარე ხრამის აუზის მართვის გეგმის შემუშავებას და წყლის ხარისხის ამაღლებისათვის საჭირო გრძელვადიანი ინსტრუმენტების შექმნას. 

შეხვედრაზე განიხილეს საკვლევი წყლის ობიექტის შესწავლის მიზნით, სამომავლოდ განსახორციელებელი კონკრეტული სამუშაოები, რაც პირველ ეტაპზე გულისხმობს არსებული მონაცემების შეგროვებას და ანალიზს, რომლის საფუძველზეც, მოხდება პრობლემების, რომლებიც საფრთხეს უქმნიან წყლის ეკოსისტემებს, იდენტიფიცირება და გადაჭრის გზების მოძიება. 

პროექტის ფარგლებში, ადგილობრივი და საერთაშორისო ექსპერტების, ადგილობრივი თვითმმართველობის წარმომადგენლების და ყველა დაინტერესებული მხარეების მონაწილეობით, შეიქმნება სპეციალური სამუშაო ჯგუფი, რომელიც შეიმუშავებს საპილოტე მდინარეთა აუზების მართვის 6 წლიან სამოქმედო გეგმას. სამუშაოების პირველი ეტაპი ზაფხულის პერიოდში დაიწყება. 

„ევროკავშირის წყლის ინიციატივა პლუს აღმოსავლეთის პარტნიორობისათვის“ პროექტი მხარს უჭერს აღმოსავლეთ პარტნიორობის ქვეყნებს წყლის რესურსების მართვის სფეროში ევროკავშირის სტანდარტებთან მიახლოებაში, ევროკავშირის წყლის ჩარჩო დირექტივის პრინციპების შესაბამისად.

შეხვედრას ესწრებოდნენ: თეთრიწყაროს მუნიციპალიტეტის მერის პირველი მოადგილე მალხაზ სამაშვილი, მერის მოადგილე ბერდია ხვისტანი, პროექტის კოორდინატორი ზურაბ ჯინჭარაძე, ექსპერტები - იუნონა ვიდენინა და იანიკ პოშონი, გაერთიანებული წყალმომარაგების კომპანიის, საქართველოს მელიორაციის წარმომადგენლები.