სიახლეების გამოწერა

27 იანვარს თეთრიწყაროს მუნიციპალიტეტის გამგეობაში ადგილობრივი ხელისუფლების ხელმძღვანელ პირებსა და კულტურული მემკვიდრეობის დაცვის ეროვნულ სააგენტოს წარმომადგენლებს შორის შედგა შეხვედრა, რომლის ფარგლებშიც განხილულ იქნა საკითხი თეთრიწყაროს ტურისტული პოტენციალის განვითარების პერსპექტივებისა და ამ მიმართულებით განსახორციელებელი ღონისძიებების შესახებ.

აღსანიშნავია, რომ თეთრიწყაროს ბუნებრივ-კლიმატური მრავალფეროვნება და ისტორიულ - კულტურული ძეგლების სიმრავლე იძლევა ტურიზმის ისეთი დარგების განვითარების შესაძლებლობას, როგორიცაა: აგროტურიზმი, ეკოტურიზმი, რეკრეაციული, ექსტრემალური და სხვა. ტურიზმის სფეროს განვითარება მნიშვნელოვან ეკონომიკურ მოგებას მოუტანს მუნიციპალიტეტს, კერძოდ: განვითარდება მცირე და საშუალო ბიზნესი, რაც თავისთავად აისახება მუნიციპალიტეტში სამუშაო ადგილების შექმნაზე.
შეხვედრას ესწრებოდნენ თეთრიწყაროს მუნიციპალიტეტის გამგებელი - ბესიკ წიკლაური, კულტურის და ახალგაზრდულ საქმეთა სამსახურის უფროსი ვაჟა სულხანიშვილი, სოფლის მეურნეობის, ეკონომიკის და მცირე ბიზნესის განვითარების სამსახურის უფროსი ვალერიან სუხიტაშვილი, საქართველოს კულტურული მემკვიდრეობის დაცვის ეროვნული სააგენტოს სამშვილდე-კლდეკარის ისტორიულ - არქიტექტურული მუზეუმ - ნაკრძალის კოორდინატორი დიმიტრი ნარიმანაშვილი და სპეციალისტები: გიორგი ხაბულიანი და ხვიჩა ბაბლუანი.