სიახლეების გამოწერა

თეთრიწყაროს მუნიციპალიტეტის გამგებლის პირველი მოადგილე ერეკლე კუხიანიძე, ქ. თეთრიწყაროში ყოფილი საავადმყოფოს შენობაში შესახლებულ აფხაზეთიდან იძულებით გადაადგილებულ მოსახლეობას შეხვდა და ადგილზე გაეცნო მათ პრობლემებს, საჭიროებებს და საცხოვრებელ პირობებს.

დევნილი მოსახლეობის მხრიდან ძირითად პრობლემად დასახელდა წყალმომარაგება, აგრეთვე სხვადასხვა სოციალური და ინფრასტრუქტურული საკითხები. ვინაიდან დევნილთა მრავალბინიანი საცხოვრებელი შენობა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ბალანსზეა, აღნიშნულმა უწყებამ 2015 წლის სექტემბერში მოსახლეობის წყალმომარაგების მიზნით დაიწყო სასმელი წყლის ჭაბურღილის მოწყობის სამუშაოები, რომლის დასრულება გათვალისწინებული იყო ორ თვეში. თუმცა დევნილ ოჯახებს დღემდე აქვთ წყალმომარაგების პრობლემა და არ მიეწოდებათ სასმელი წყალი.
გამგებლის პირველი მოადგილე ერეკლე კუხიანიძე მოსახლეობას დაპირდა მუნიციპალიტეტის გამგეობის კომპეტენციებს მიკუთვნებული ყველა პრობლემური საკითხის შესწავლას და შეძლებისდაგვარად დახმარებას. პრობლემის დროულად გადაჭრის მიზნით, თეთრიწყაროს მუნიციპალიტეტის გამგეობა შუამდგომლობით მიმართავს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს.