სიახლეების გამოწერა

18 აპრილს ქ. თეთრიწყაროში, საქართველოს ეროვნული ფილარმონიის ორგანიზებით და თეთრიწყაროს მუნიციპალიტეტის გამგებლის ბესიკ წიკლაურის მხარდაჭერით, ყველასათვის ცნობილი და საყვარელი კომპოზიტორის, საქართველოს სახალხო არტისტის და მსოფლიო დონის ხელოვანის ვაჟა აზარაშვილის საიუბილეო საღამო გაიმართა.

ღონისძიებაში მონაწილეობდნენ მსახიობი ვლადიმერ ხელაშვილი, ცნობილი მომღერალი ზურაბ კობეშავიძე და პოეტი მანანა დანგაძე, რომლის ლექსებზეც კომპოზიტორს შექმნილი აქვს მრავალი სიმღერა. მსმენელს ჰქონდა საშუალება პირადად გასაუბრებოდა და მოესმინა დიდი მაესტროს შესრულებით ცნობილი და პოპულარული საესტრადო სიმღერები საკუთარი შემოქმედებიდან.
განუზომლად დიდია ბატონი ვაჟას დამსახურება და წვლილი ქართული მუსიკალური ხელოვნების განვითარებაში, მისი შემოქმედება გამორჩეულია ჟანრობრივი მრავალფეროვნებით, ვაჟა აზარაშვილმა შექმნა კლასიკური, საორკესტრო, საბალეტო, საესტრადო მუსიკის პოპულარული ნაწარმოებები, რომლებიც შეიყვარა ყველა თაობის მსმენელმა.
2016 წელს დიდ მაესტროს დაბადებიდან 80 და სასცენო მოღვაწეობიდან 60 წელი შეუსრულდა. მუნიციპალიტეტის გამგეობა ულოცავს ბატონ ვაჟა აზარაშვილს საიუბილეო თარიღს.