სიახლეების გამოწერა

27 დეკემბერს თეთრიწყაროს მუნიციპალიტეტის გამგეობის სააქტო დარბაზში ასოციაცია სამხარეო განვითარება მომავალი საქართველოსთვის (RDFG) ახალი პროექტის „სოფლის მდგრადი განვითარება თეთრიწყაროს მუნიციპალიტეტში“ იგივე „ENPARD თეთრიწყაროს“ პრეზენტაცია გაიმართა. პროექტი „სოფლის მდგრადი განვითარება თეთრიწყაროს მუნიციპალიტეტში“ სოფლისა და სოფლის მეურნეობის განვითარების ევროპის სამეზობლო პროგრამის ENPARD-ის მეორე ფაზის ფარგლებში ხორციელდება. ოთხწლიანი პროექტის მიზანია ინოვაციური სოციო-ეკონომიკური მოდელების დანერგვით, თეთრიწყაროს რეგიონში ცხოვრების დონის გაუმჯობესება. პროქეტის ბიუჯეტი 2.4 მილიონ ევროს შეადგენს.
ENPARD II სოფლის განვითარების ევროპულ მოდელს „ლიდერს“ (LEADER) იყენებს. მისი მიზანია, სოფლის განვითარებაში ჩართოს ადამიანები, როგორც განმახორციელებელი პირები და არა როგორც მოსარგებლეები. აღნიშნული მიდგომით შესაძლებელი ხდება სოფლის სამომავლო განვითარება, რისთვისაც კონკრეტულ ტერიტორიაზე „ადგილობრივი განვითარების ჯგუფები“ იქმნება, როგორც პარტნიორობა კერძო, საჯარო და სამოქალაქო სექტორებს შორის.
პროექტს „სოფლის მდგრადი განვითარება თეთრიწყაროს მუნიციპალიტეტში“ ახორციელებს ასოციაცია სამხარეო განვითარება მომავალი საქართველოთვის (RDFG) ევროკავშირის ფინანსური მხარდაჭერით. მისი პარტნიორები არიან აგრო-ტექნოლოგიების ასოციაცია, ლიტვის განვითარების ჯგუფების ქსელი და ლიტვის სოფლის მეურნეობის სამინისტრო.
პროექტის პრეზენტაციას ესწრებოდნენ: თეთრიწყაროს მუნიციპალიტეტის გამგეობის და საკრებულოს თანამშრომლები,თეთრიწყაროს მუნიციპალიტეტის გამგებლის წარმომადგენლები ადმინისტრაციულ ერთეულებში და ადგილობრივი მოსახლეობა.