სიახლეების გამოწერა

წალკისა და თეთრიწყაროს მუნიციპალიტეტებისათვის ნარჩნების გადამტვირთი სადგურის მოწყობის სამუშაოები დასრულდა. შპს “საქართველოს მყარი ნარჩენების მართვის კომპანიამ,” საქართველოს რეგიონული განვითარებისა და ინფრასტრუქტურის სამინისტროს კოორდინაციით, თეთრიწყაროს და წალკის მუნიციპალური ნაგავსაყრელები შესაბამისი სტანდარტებით დახურა და მოეწყო ნარჩენების გადამტვირთი სადგური. შესრულებული სამუშაოები დაათვალიერეს საქართველოს რეგიონული განვითარებისა და ინფრასტრუქტურის მინისტრმა ზურაბ ალავიძემ, ქვემო ქართლში სახელმწიფო რწმუნებულ-გუბერნატორმა პაატა ხიზანაშვილმა, „საქართველოს მყარი ნარჩენების მართვის კომპანიის“ დირექტორმა გიორგი შუხოშვილმა და თეთრიწყაროს მუნიციპალიტეტის გამგებელმა ბესიკ წიკლაურმა. თეთრიწყაროსა და წალკის მუნიციპალური ნაგავსაყრელები შპს“საქართველოს მყარი ნარჩენების მართვის კომპანიას“ 2013 წელს გადაეცა. ნაგავსაყრელებზე არსებული მდგომარეობა უკიდურესად მძიმე იყო: ნარჩენების შეტანა ხდებოდა არაორგანიზებულად, კონტროლი და სანიტარული ზედამხედველობა პოლიგონებზე არ ხორციელდებოდა. ნაგავსაყრელები ზიანს აყენებდა გარემოს და საფრთხეს უქმნიდა ადგილობრივი მოსახლეობის ჯანმრთელობას. საქართველოს მყარი ნარჩენების მართვის კომპანიამ თეთრიწყაროს და წალკის ძველი ნაგავსაყრელები სტანდარტების შესაბამისად დახურა და აღნიშნული მუნიციპალიტეტებისთვის სოფელ ალგეთის მიმდებარე ტერიტორიაზე მოეწყო ნარჩენების გადამტვირთი სადგური, რომელიც გულისხმობს მუნიციპალიტეტების მიერ შეგროვებული საყოფაცხოვრებო ნარჩენების დიდ კონტეინერში ჩატვირთვას და სპეციალური გადამტვირთი მანქანებით მათ რეგულარულ ტრანსპორტირებას მარნეულის კეთილმოწყობილ მუნიციპალურ ნაგავსაყრელზე. გადამტვირთი სადგურები აკმაყოფილებს კანონით გათვალისწინებულ სტანდარტებს. თეთრიწყაროს და წალკის არსებული ნაგავსაყრელების დახურვისა და მათთვის ნარჩენების გადამტვირთი სადგურის მოწყობის პროექტები სახელმწიფო ბიუჯეტიდან დაფინანსდა და ჯამში 427 933 ლარი შეადგინა. ვიზიტის ფარგლებში საქართველოს რეგიონული განვითარებისა და ინფრასტრუქტურის მინისტრმა ზურაბ ალავიძემ, თეთრიწყაროს მუნიციპალიტეტის გამგეობას თანამედროვე სტანდარტების შესაბამისი 2 ნაგავმზიდი მანქანა გადასცა. ნაგავმზიდი მანქანები საქართველოს მუნიციპალური განვითარების ფონდმა ევროპის რეკონსტრუქციისა და განვითარების ბანკის(EBRD) ფინანსური მხარდაჭერით შეიძინა.