სიახლეების გამოწერა

სახალხო უნივერსიტეტთა გერმანული ასოციაციის (DVV International) საქართველოს ოფისი არასამთავრობო ორგანიზაცია „ლელი“-სთან ერთად 2015 წლიდან ანხორციელებს ევროკავშირის მიერ დაფინასებულ პროექტს „აქტიური ცხოვრებისათვის: ხანდაზმულთა უფლებების ხელშეწყობა და მათი შესაძლრებლობების გაზრდა საქართველოში“, რომელიც ემსახურება ასაკოვანი ადამიანების უფლებების დაცვას, მათი ცხოვრების ხარისხის გაუმჯობესებას და სოციალური ადაპტაციის ხელშეწყობას საქართველოს ოთხ რეგიონში: თბილისში, ქვემო ქართლში (თეთრიწყაროში), კახეთსა და სამეგრელოში.

პროექტი აერთიანებს 60 წელს გადაცილებულ ადამიანებს და ზრუნავს მათი ყოველდღიური ყოფის, ინტერესების, ნიჭისა და შესაძლებლობების რეალიზებაზე. სწორედ ამ მიზანს ემსახურება სპექტაკლი სახელწოდებით „ბედნიერების ასაკი“, რომლის პრემიერა გაიმართა 10 მაისს, კახა ბაკურაძის მოძრაობის თეატრში.
სპექტაკლში მონაწილეობდნენ მოყვარული მსახიობები, მომღერლები, სახალხო მთქმელები თბილისიდან, თეთრიწყაროს მუნიციპალიტეტიდან, წალენჯიხიდან, ლაგოდეხიდან და პროექტის ფარგლებში აღდგენილი ხალხური სიმღერის გუნდი „შვიდკაცა“. სპექტაკლის სცენარისტი და დამდგმელი რეჟისორია დრამამატურგი თამარ ბართაია. პრემიერას ესწრებოდნენ: თეთრიწყაროს მუნიციპალიტეტის გამგებელი ბესიკ წიკლაური, DVV international-ის დირექტორი მატიას კლინგერბერგი, DVV international-ის დირექტორი საქართველოში ლალი სანთელაძე და სხვა მუნიციპალიტეტების ხელმძღვანელი პირები.